Әлемдік БАҚ-тағы Қазақстан: виза беруді жеңілдету, бейбітшілікке бастама және Орталық Азияның талқысы
АСТАНА. KAZINFORM – Әдеттегідей алыс-жақын елдердің ақпарат құралдарынан Қазақстан жайлы жаңалықтарды көп ұшыраттық. Әсіресе, Еуропалық Одақпен байланысты арттыру, Баку мен Ереван арасындағы бейбітшілікті Астананың қолдауы жөніндегі деректер елеусіз қалдырмады. Бұдан бөлек, Орталық Азия кәрі құрлық елдерімен бірлесіп Транскаспий халықаралық көлік бағытын дамытуға мүдделі. Өз кезегінде көрші Өзбекстан Қазақстанмен тауар айналымын арттыруды мақсат етіп отыр. Толығырақ Kazinform тілшісінің шолуынан оқыңыз.
Report: Еурокомиссия мен Қазақстан виза беруді жеңілдету туралы келісімдерді бастады
Қазақстан Президенті Қасым-Жомарт Тоқаев пен Еуропалық Одақтың сыртқы істер және қауіпсіздік саясаты жөніндегі жоғарғы өкілі әрі Еурокомиссияның вице-президенті Кая Каллас кездесіп, жан-жақты ынтымақтастықтың перспективаларын сөз етті. Ақпаратты Ақордаға сілтеме жасай отырып, Report хабарлады.
Ең әуелі Каллас Қазақстан ЕО-мен кеңейтілген серіктестік пен ынтымақтастық туралы келісімге қол қойған бірінші ел екенін ерекше атап өтті. Оның айтуынша, бұл – екіжақты қарым-қатынастың жоғары деңгейде дамуының дәлелі. Сондай-ақ Еурокомиссия мен Қазақстан арасында виза беру тәртібін жеңілдету туралы келісім жасасу рәсімінің басталғаны туралы жария етті.
Өз кезегінде Қасым-Жомарт Тоқаев Қазақстанда бұл жаңалықты оң қабылдап отырғанын, себебі кезекті қадам еуропалық мемлекеттермен іскерлік және тұлға аралық байланыстарды нығайтуға кең мүмкіндіктер ашатынын жеткізді.
Бұған қоса, кездесуде энергетика, өнеркәсіп, цифрландыру сияқты басым салалардағы сауда-экономикалық әріптестікті кеңейтуге, Транскаспий көлік дәлізін дамытуға бағытталған ірі инфрақұрылымдық жобаларды іске асыруға көңіл бөлінді.
Anadolu: Астана Баку мен Ереван арасындағы бейбіт шарт жобасын құптайды
Таяуда Қазақстан Президенті Қасым-Жомарт Тоқаев Арменияның Сыртқы істер министрі Арарат Мирзоянды қабылдады. Осы тұста Қазақстан тарапы Ереван мен Баку арасындағы Бейбітшілік және мемлекетаралық қатынастар туралы келісім жобасының мәтіні бойынша келіссөздердің аяқталғанын құптайтынын жеткізді. Жаңалықты Ақордаға сілтеме бере отырып, түркиялық Anadolu агенттігі жазды.
Бұл айтулы оқиға Армения мен Әзербайжан арасында бейбітшілік орнауының жаршысы болады және өңірдің Қазақстанмен де, Орталық Азияның барлық елдерімен де ынтымақтастығын нығайтуға ықпал етпек.
Қасым-Жомарт Тоқаев президенттердің өткен жылғы өзара сапарлары қазақ-армян қарым-қатынастарының жан-жақты дамуына елеулі серпін бергенін атап өтті.
Өз кезегінде армян дипломаты жылы шырайлы қабылдағаны үшін Қазақстан Президентіне ризашылығын білдірді. Дипломатиялық ведомство басшысы Армения мен Қазақстанның сыртқы істер министрліктері, басқа да ведомстволары Қасым-Жомарт Тоқаевтың өткен жылы Ереванға ресми сапары барысында қол жеткізілген уағдаластықтарды іске асыру бойынша жұмыс істеп жатқанын хабарлады.
Кездесу барысында сауда-экономикалық, инвестициялық, көлік-логистикалық және мәдени-гуманитарлық салалардағы екіжақты қарым-қатынастарды дамыту перспективалары қаралды. Қазақстан Президенті отандық бизнестің Арменияға тауар жеткізуді 350 млн долларға ұлғайтуға дайын екенін мәлімдеді.
Trend: Орта дәлізді кеңейту мәселесі талқыланды
Қазақстан, Тәжікстан, Түрікменстан, Қырғызстан және Өзбекстан сыртқы істер министрлігі өкілдерінің қатысуымен Ашхабадта Еуропалық Одақ пен Орталық Азияның 20-кездесуі өтті. Ақпаратты әзербайжандық Trend басылымы бөлісті.
Алдымен министрлер 2024 жылғы қаңтарда Брюссельде өткен Global Gateway инвесторлар форумының табысты өткенін атап өтіп, еуропалық және халықаралық қаржы институттарының Транскаспий халықаралық көлік бағытына 10 млрд еуро инвестициялау міндеттемелерін құптады. Олар Орталық Азия мен Еуропа арасындағы байланыстарды жақсарту, сондай-ақ өңірлік экономикалық өсімді ынталандыру үшін осы дәліздің маңыздылығын алға тартты.
Кездесуге қатысушылар 2024 жылғы маусымда Орта дәліз үшін үйлестіру тұғырнамасын іске қосуды ұйымдастырудағы Қазақстанның және 2024 жылғы қазанда жоғары деңгейдегі іс-шараны өткізуде Түрікменстанның рөлі маңызды болғанын сөз етті. Өңірлік сауда мен логистиканы дамыту үшін Оңтүстік Кавказбен ынтымақтастықты құптады.
Бұдан басқа, ЕО мен Орталық Азия қарым-қатынастарындағы маңызды шикізат ресурстарына назар аудару мәселесі талқыланған. Министрлер ЕО мен Қазақстан, сондай-ақ ЕО мен Өзбекстан арасындағы жергілікті өндірістік-өткізу тізбектерін нығайтуға, халықаралық стандарттарға сәйкестікке және орнықты инвестицияларды қолдауға бағытталған стратегиялық әріптестікті қолдады.
Орта дәліз бірнеше елдер арқылы өтетін және Азияны Еуропамен байланыстыратын көлік-сауда бағыты болып тұр. Ол дәстүрлі Солтүстік және Оңтүстік дәліздерге балама ретінде қарастырылуда. Маршрут Қытайдан басталып, Қазақстан, Өзбекстан және Түрікменстан сияқты Орталық Азия елдері арқылы өтеді. Содан кейін Каспий теңізін, Әзербайжан, Грузия мен Түркияны кесіп өтіп, Еуропаға жетеді. Жыл өткен сайын тараптар үшін бұл бағыттың маңызы артуда.
Daryo: Қазақстан мен Өзбекстан 2030 жылға қарай тауар айналымын 10 млрд долларға жеткізуді жоспарлауда
2024 жылы екі ел арасындағы сауда көлемі 4,3 млрд долларға жетті. Өсім азық-түлік және тоқыма тауарларының, түсті металдардың, химиялық өнімдер мен пластмассадан жасалған бұйымдар бойынша тіркелген. Хабарды өзбекстандық Daryo таратты.
Өзбекстанда негізінен сауда, ІТ, құрылыс, қаржы және жылжымайтын мүлік салаларында қазақстандық капиталы бар 1042 кәсіпорын жұмыс істейді. Қазақстанда өзбекстандық капиталы бар 4 500-ден астам компания тіркелген. Бұл күні кәсіпкерлерді қолдауды кеңейту туралы келісімге қол жеткізілген.
Наурыздың ортасында Өзбекстанның инвестициялар, өнеркәсіп және сауда министрі Лазиз Құдратов пен Қазақстанның сауда және интеграция министрі Арман Шаққалиев кездескен. Тараптар екіжақты келісімдерді іске асыру және сауда-экономикалық ынтымақтастықты одан әрі нығайту жөніндегі шараларды талқылады.
Оның қорытындысы бойынша, 2030 жылға қарай тауар айналымын 10 млрд долларға дейін ұлғайту жөніндегі бағдарламаға қол қойылды. Өңір басшыларының 2025 жылға арналған сапарларының кестесі де бекітілді.
Өзбекстан тарапы «Термез» халықаралық сауда орталығында қазақстандық өнімдер павильонының ашылғанын атап өтіп, оның сұраныста боларына сенім білдірді.
