Әлемдік мұнай бағасы апта бойы құлдырап жатыр
АЛМАТЫ. KAZINFORM — Жұма күні таңертең әлемдік мұнай бағасы аздап төмендеді.
13 қараша таңертеңгі сауда қорытындысы бойынша, Brent маркалы мұнайдың қаңтар айындағы фьючерстері барреліне 95,65 доллар болды. Бұл алдыңғы көрсеткіштен 0,17 долларға немесе 0,18%-ға төмен.
Oilprice.com мәліметінше, америкалық WTI маркалы мұнай фьючерстері барреліне 88,35 доллар деңгейінде саудаланды. Оның бағасы 0,39 долларға немесе 0,44%-ға арзандады.
Осылайша, мұнайдың екі негізгі түрі де екінші апта қатарынан арзандап отыр.
Ал ресейлік Urals маркалы мұнайдың бағасы барреліне 72,18 доллар болды. Бұл 0,02 долларға немесе 0,03%-ға жоғары.
Мұнай нарығындағы ахуал Ормуз бұғазындағы кеме қатынасына төнген қауіп-қатерлерге байланысты әлі де тұрақсыз.
11 қарашада Йеменнің «Ансар Аллах» қозғалысы (хуситтер) Сауд Арабиясындағы Эр-Рияд халықаралық әуежайы мен Янбу қаласы маңындағы мұнай инфрақұрылымына соққы жасағанын мәлімдеді.
Сонымен қатар 11 қараша, сәрсенбі күні Абу-Дабиде Ресей, Украина және АҚШ арасындағы екі күндік үшжақты келіссөздер аяқталды.
Кездесудің басты практикалық нәтижесі — тұтқындарды ауқымды көлемде алмасу туралы алдын ала келісімге қол жеткізу болды.
