Әлемнің мықты әскерлері рейтингінде Өзбекстан 65-орында тұр

Әлем елдері армияларының жыл сайынғы рейтингінде Өзбекстанның Қарулы күштері 65-орынға ие болды, деп хабарлайды Kazinform агенттігінің меншікті тілшісі.

Әлемдегі ең мықты әскерлердің рейтингін Global Firepower талдау орталығы ұсынды. Тізімге 145 мемлекет енген. 

Мұнда Өзбекстан үш позицияға сырғып, 65-орынға тұрақтады. Осыдан бір жыл бұрын аталған ел рейтингіде 62-ші тұрған еді. Жоғарыда келтірілген мәліметтерге сәйкес, Өзбекстанның қорғаныс бюджеті 796 млн долларға бағаланды. Қызметке жарамды адами ресурстардың жалпы саны - 13,7 млн, ал әскери қызметшілер саны - 68 мың.

Орталық Азия елдері арасында Қазақстан армиясының позициясы ілгері. Еліміз рейтингіде 58-орында тұр. Түрікменстан - 83, Қырғызстан - 100, Тәжікстан болса 107-орынға жайғасты.

Әлемдегі ең мықты армиялардың үштігіне АҚШ, Ресей және Қытай енді. Сондай-ақ алғашқы ондыққа Үндістан, Оңтүстік Корея, Ұлыбритания, Жапония, Түркия, Пәкістан және Италия кірді.

Global Firepower рейтингі 60-тан астам түрлі факторлар негізінде құрылады. Әскери саланы қаржыландыру көлемі, әскер және бөлімдердің саны, олардың материалдық-техникалық жарақтандырылуы, елдің көлік инфрақұрылымы мен географиялық орналасуы да ескеріледі.