Әлеуметтік жағынан аз қамтылған азаматтарға түскі ас берілді - Қызылорда

ЫЗЫЛОРДА. Маусымның 18-і. ҚазАқпарат (Руслан Игілік) - Қызылорда қаласының іргесіндегі Тасбөгет кентіндегі «Арман» мейрамханасында республикалық «Бірлігіміз жарасқан» акциясы аясында әлеуметтік жағдайы төмен азаматтарға түскі ас берілді.

Ол «Тұрмысы төмен азаматтарды қолдау жөніндегі аймақтық қордың» ұйытқы болуымен өткізілді.

Облыстық жұмыспен қамтуды үйлестіру және әлеуметтік бағдарламалар басқармасы жанындағы «Ардагерлер үйі» мемлекеттік мекемесі мен «Тұрмысы төмен от­басыларын қолдау жөніндегі аймақтық қор» өткізіп отырған бұл шара «Сыр мейірімі» атты жоба негізінде жүзеге асырыла бастады.

Шара соңында дастарқан басындағы азаматтар атынан кент тұрғыны Мадияр Жұман­тай мейірімділік нышанын жасап жатқан жандарға алғыс сезімін жеткізді.

Осы күнгі игілікті шара қаланың Титов, Гагарин және Шанхай аудан­дарындағы «Болашақ», «Бақыт» дәмханаларында жалғасты. Бір мезгілде түскі ас 109 адамға берілсе, жүріп-тұруы қиын 65 адамға ол үйлеріне апарылып берілді. Ас тарату үшін арнайы ыдыстар мен көліктер бөлінді. Бұл шарада барлығы 174 азамат қамтылды. Жыл соңына дейін жү­ре­тін шара кезінде ай сайын осындай азаматтар санаты анықталып, аз қамтамасыз етіл­ген жандар акция барысында мей­лінше молынан қамтылатын болады. Оған тиісті қорлар арқылы 24 млн. теңгеге жуық қаржы қаралып отыр.