Әлеуметтік желілерде «Сабина келін-2» фильмнің жарнамалық бейнеролигі пайда болды

АЛМАТЫ. ҚазАқпарат - Әлеуметтік желілерге Сабина келін жайындағы комедияның екінші бөлімінің жарнамалық бейнеролигі шықты. Бұл туралы бүгін өзінің Фейсбук әлеуметтік желісіндегі парақшасында режиссер, продюсер және актер Нұртас Адамбаев хабарлады.

«Достар! Назарларыңызға «Сабина келін-2» фильмінің трейлерін ұсынып отырмыз. Бұл - көптен күткен «Сабина келін» комедиясының жалғасы. Көктемгі Наурыз мерекесіне орай сіздерге жасалған көңілді сыйлық. Сабина сіздерді сағынды», - деп жазған Н. Адамбаев.

Естеріңізге сала кетелік, өткен жылдың қараша айында «Сабина келін» фильмі Индонезияда өткен кинофестивальдің гран-при жүлдесін жеңіп алған болатын.

Нұртас Адамбаев енді өзінің туған қаласы жайында «Тараз» атты көркем фильм түсірмек. Оның айтуынша, бұл кинотуынды бұған дейінгі фильмдерге мүлдем ұқсамайтын болады.