Әлеуметтік желілерде тараған бала ұрлығына қатысты ақпараттар шындыққа жанаспайды - ҚР ІІМ

АСТАНА. ҚазАқпарат - Әлеуметтік желілерде бала ұрлығына қатысты ақпараттар шындыққа жанаспайды, деп хабарлады ҚР Ішкі істер министрлігінің баспасөз қызметінен.

«Әлеуметтік желілерде Қарағанды мен Алматы қалаларындағы ойын алаңдарында балалардың ұрлану әрекеттері туралы қауесеттердің тарауына, сондай-ақ пайдаланушылардың парақшаларында куәгерлердің сөздері негізінде жасалды делінген «фотороботтың» орналасуына байланысты ақпараттың шындыққа жанаспайтынын, аталған ақпараттың ішкі істер органдары бөліністерінен таралмағандығын және мақсатты араңдату әрекеті екендігін хабарлаймыз», - делінген хабарламада. Министрліктің ақпаратына қарағанда, жалған қауесеттердің жарияланымы мен таралу фактісі бойынша тексеру жүргізілуде. Елдегі қолданыстағы заңнамаға сәйкес көрінеу жалған ақпарат тарату фактісі үшін қылмыстық жауапкершілік қарастырылған.