Алғаш рет мүгедек арбасындағы теннистен ел кубогі өтеді

АСТАНА. ҚазАқпарат – Алматы қаласында 17-19 наурызда алғаш рет мүгедек арбасындағы теннистен Қазақстан кубогі жарысы өтеді, деп хабарлайды ҚазАқпарат тілшісі.

Қазақстан теннис федерациясынан мәлім еткеніндей, турнирге Алматы, Астана, Қарағанды, Ақтау, Ақтөбе және Орал қаласынан 40-тан астам спортшы қатысып, бақ сынайды.

Бірінші кубокке дайындық аясында Алматыда 6-16 наурыз аралығында теннисшілердің шеберлігін арттыруға арналған оқу-жаттығу жиыны өтеді.

Дода қорытындысы бойынша биылғы маусым айында Италияда «Alghero Open» халықаралық турнирінде ел намысын қорғайтын спортшылар анықталады.

Қажетті ұпайды жинаған жағдайда қазақстандық паратеннисшілер 23 қыркүйек – 8 қазан аралығында Ханчжоуда (Қытай) болатын Паразия ойындарына қатысуға мүмкіндік алады.

Еске сала кетейік, бұдан бұрын Елена Рыбакинаның Дубай жарысының үшінші айналымына өткенін жазған болатынбыз.

Фото: Қазақстан теннис федерациясы