Алғыс айту күні: Атырауда өзге этностың баласы «Ерке сылқым» күйін тартып берді

АТЫРАУ. KAZINFORM – Атырауда 1 наурыз – Алғыс айту күніне орай «Алғыс айту – адамгершіліктің белгісі» челленджі өтіп жатыр. Аталған челленджді «Қоғамдық келісім» коммуналдық мемлекеттік мекемесі ұйымдастырды.

Челленджге Атырау қаласындағы жалпы білім беретін №24 орта мектептің оқушылары да қатысты. Соның бірі – Степан Пархоменко. 

Ол қазақша мүдірмей сөйлейді. Қазақтың ұлттық аспабы – домбырамен күй шертеді. 

Бүгін баршаны 1 наурыз – Алғыс айту күнімен құттықтап, композитор Әбдімомын Желдібаевтың «Ерке сылқым» күйін орындап берді. 

Атыраудағы «Довира» украин этномәдени бірлестігінің өкілі София Павленко да қазақ халқына алғысын білдірді. 

– Біз бір шаңырақтың астында тұрамыз. Біз – қазақстандық бір отбасының мүшесіміз. Қазақ бауырларымызға қайырымдылығы, мейірімділігі үшін, толеранттылығы мен адамгершілігі, сыйластығы үшін алғысымды айтамын. Біздің Қазақстанымыз өркендеп, бірлігіміз арта берсін, -дейді София Павленко. 

Еске сала кетелік, бұдан бұрын ҚХА кеңесінің мүшесі қазақ халқына салт-дәстүрі мен тілін меңгеру арқылы да алғыс айтуға болатынын білдірген еді.