Алматы арықтарында су тапшы ма — министрлік жауабы

АСТАНА. KAZINFORM — Су ресурстары және ирригация министрлігі Алматы арықтарындағы су тапшылығына қатысты түсінік берді.

Орталық коммуникациялар қызметі алаңында өткен баспасөз мәслихатында «Алматыда аптап ыстыққа байланысты арықтарда су жоқ. Бұл су тапшылығымен байланысты ма?» — деген сауал қойылды.

— Иә, расында да, қалыптасқан ауа райы жағдайына байланысты бірқатар өңірдегі су қоймаларында су деңгейінің төмендеуі байқалып отыр. Алайда, қазір су барлық су шаруашылығы нысандарының өтініміне сәйкес және тұтынушыларға кезекпен жеткізіліп жатыр. Осыған байланысты кейбір учаскеде су деңгейінің төмендеген болуы мүмкін, — деп жауап берді Су ресурстары және ирригация министрлігі су ресурстарын пайдалануды реттеу департаментінің басшысы Сәкен Әтел.

Министрлік өкілінің мәлімдеуінше, бұл уақытша құбылыс, жақын арада жағдай қалыпқа келеді. 

— Тағы бір айта кетерлігі, арықтардағы судың азаю жағдайы, сұраныстың артуына байланысты болып отыр, — дейді спикер.

Сондай-ақ брифинг барысында неліктен Қазақстан көрші елдермен су мәселесін шеше алмай отыр деген мәселе көтерілді. 

Айта кетейік, алдағы 4-5 жылда елімізде су шаруашылығы саласына 2 мыңдай маман қажет деген болжам бар.