Алматы облысы Іле ауданының әкімі не үшін ұсталғаны белгілі болды

ҚОНАЕВ. KAZINFORM - Алматы облысының прокуратурасы Іле ауданының әкімі Бағдат Қарасаевтың ұсталуына қатысты түсінік берді.

Қадағалау органының мәліметінше, аудан әкіміне кәсіпкерлік қызметке заңсыз қатысты, лауазымдық өкілеттіктерін асыра пайдаланып мемлекеттік мүдделерге нұқсан келтірді деген айып тағылды.

«2024 жылғы 3 қыркүйектегі жедел-іздестіру іс-шараларының нәтижесінде әкім Б.А. Қарасаев сыбайлас жемқорлық қызметіне күдік бойынша Қазақстан Республикасы Қылмыстық-процестік кодексінің 128-131-баптарының тәртібінде ұсталды. Аталған қылмыстар үшін мүлкі тәркіленіп, 10 жылға дейінгі мерзімге бас бостандығынан айыру түріндегі жаза көзделген», - деп хабарлады Алматы облысының прокуратурасы.

Бүгін, 4 қыркүйекте прокуратура бұлтартпау шарасын санкциялау үшін қылмыстық іс материалдарын сотқа жолдады.

Бұған дейін сыбайлас жемқорлыққа қарсы қызмет Қарасаевтың ұсталғаны туралы ақпаратты растаған болатын.