Алматы облысының тауларында қар көшкіні жүрді
ҚОНАЕВ. KAZINFORM – Алматы облысында өздігінен қар көшкіні жүрді.
– Облыстық Төтенше жағдайлар департаментінен атап өткендей, 10 наурыз түскі сағат 15:50-де «Ақбұлақ» тау шаңғы курортында, теңіз деңгейінен 2664 метр биіктікте, көлемі 300 текше метр болатын қар көшкіні өздігінен жүрді. Көшкін сайға түсті, – деп хабарлады ведомстводан.
Зардап шеккендер мен қираулар жоқ.
Оқиға орнына «Қазселденқорғау» мемлекеттік мекемесі, Алматы облысының ТЖД және курорт әкімшілігінен 5 маман мен 3 техника шықты.
– Жағдай бақылауда. Мамандар курорт аумағындағы қар жамылғысына мониторинг жүргізуді жалғастырып жатыр, – деп хабарлады Алматы облысы Төтенше жағдайлар департаментінің баспасөз қызметі.
Осыған дейін Шымбұлақта шаңғышылар қар көшкінінің жүруіне себеп болғаны туралы жазғанбыз.
