Алматы облысында емделу үшін ақша жымқырған бухгалтерге сот шешімі өзгеріссіз қалды

АЛМАТЫ. KAZINFORM - Сеніп тапсырылған бөтен мүлікті аса ірі мөлшерде талан-таражға салу фактісі бойынша сотталған Т.-ға қатысты Алматы облысы Балқаш аудандық сотымен шығарылған үкімді Алматы облыстық соты прокурордың апелляциялық өтінішхатын бойынша қарады.

Сот мәліметіне сәйкес, 2020 жылдан 2024 жылдың ақпанына дейін Т. "Балқаш аудандық жұмыспен қамту және Әлеуметтік бағдарламалар бөлімі" ММ-нің бас маман – есепшісі лауазымын атқарған.

Ол ай сайын өзінің және әріптестерінің жеке есеп шоттарына бекітілген мөлшерден артық сомада жалақыны аударған, сондай-ақ тиісті бұйрықтарсыз ақшалай қаражатты сыйақы, материалдық көмек, біржолғы әлеуметтік төлемдер және іс-сапар шығындары үшін өтемақы түрінде аударған. Осыдан кейін Т. әріптестеріне артық аударылған ақшаны қате аударылған деп сендіріп, оны өзінің жеке шотына аударуды сұраған.

Осылайша алынған қаражатты ол өзінің қажеттіліктері үшін, атап айтқанда ауыр ауруды емдеу үшін пайдаланған. Өз әрекеттерімен Т. мемлекетке 26,5 млн теңге көлемінде материалдық залал келтірген. Балқаш аудандық сотының үкімімен Т.-ға ҚК-нің 189-бабының 4-бөлігі 2-тармақшасы бойынша 7 жылға бас бостандығын шектеу түрінде жаза тағайындалып, мемлекеттік қызметте қызмет атқаруға өмір бойына тыйым салынған.

Апелляциялық саты 7 жыл бас бостандығынан айыру түріндегі негізгі жаза тағайындауды сұраған прокурордың өтініші бойынша қаралды.

- Сот алқасы істің материалдарын зерделеп, зерттей келе, бірінші сатыдағы сот үкім шығарған кезде сотталған Т.-ның шын ниетпен өкінуі, оның мүгедектігі, онкологиялық ауруы, оң сипаттамалары, келтірілген мүліктік залалдың толық өтелуі, сондай-ақ жәбірленуші тараптың ұстанымы ескерілді деген қорытындыға келді. Алматы облыстық сотының қылмыстық істер жөніндегі сот алқасының қаулысымен даулы сот актісі өзгеріссіз, ал прокурордың өтінішхаты қанағаттандырусыз қалдырылды, - деп хабарлады облыстық соттан.

Қаулы заңды күшіне енді.

Еске салайық, бұған дейін Алматы облысында студент қызды қатыгездікпен өлтірген қылмыскерлер сотталғанын жазғанбыз.