Алматы облысында ер адам таудағы өзенге батып кетті

АЛМАТЫ. KAZINFORM — Алматы облысында ер адам ағысы қатты таудағы өзенге батып кетті. Бұл туралы ҚР ТЖМ жедел-құтқару отряды хабарлады. 

«Жедел-құтқару отряды марқұмның денесін суға түскен жерінен 1 км қашықтықтан тапты. Денесі шығарылды. Полиция қызметкерлеріне табысталды», — делінген хабарламада. 

Мәлім болғандай, Алматы облысы Қарасай ауданындағы Қаскелең шатқалында 1961 жылы туған азамат отбасы сондай-ақ достарымен бірге демалып жүрген. Суға түсіп, сергігісі келген азаматты өзеннің қатты ағысы алып кеткен. 

Еске сала кетейік, бұған дейін биыл елімізде шомылу маусымы басталғалы 70 адамның ажалы судан келгенін жазған болатынбыз.