Алматы облысында Instagram арқылы заңсыз лотерея ұйымдастырған азамат жазаланды

ҚОНАЕВ. KAZINFORM - Алматы облысының Балқаш аудандық сотында заңсыз лотерея ұйымдастырған Н.-ға қатысты әкімшілік құқық бұзушылық туралы іс қаралды.

Сот мәліметіне сәйкес, 2024 жылдың шілде айында Н. өзінің Instagram парақшасында заңсыз лотерея ұйымдастырып, "Jetour" маркалы автокөлігін ойнатқан. Лотереяға қатысу үшін 200 теңге көлеміндегі шексіз лотерея билетінің құнын Н.-ның жеке банктік шотына аудару қажет болған.

Алматы облыстық соты құқық бұзушылық Н. лотерея операторы болып табылмайтын тұлға жөнінде хабарлама, Instagram парақшасының скриншоттары және істің басқа да материалдарымен расталғанын хабарлады.

- Сот Н.-ны ӘҚБтК-нің 445-1-бабы 6-бөлігі бойынша әкімшілік құқық бұзушылық жасағаны үшін кінәлі деп танып, оған 100 АЕК, яғни 369 200 теңге көлемінде айыппұл түрінде жаза тағайындады, - деп мәлімдеді облыстық сот.

Сот қаулысы заңды күшіне енді.

Еске салайық, бұған дейін Алматы облысында емделу үшін ақша жымқырған бухгалтерге сот шешімі өзгеріссіз қалғанын жазғанбыз.