Алматы облысында көпбалалы ана сот арқылы тұрғын үй кезегіне қайта тұрды

АЛМАТЫ. KAZINFORM — Алматы облысының мамандырылған ауданаралық әкімшілік соты тұрғын үй кезегінен шығарылған көпбалалы анаға қатысты істі қарады.

Еңбекшіқазақ ауданының тұрғыны 2021 жылы «көпбалалы отбасы» санаты бойынша тұрғын үй алуға кезекке тұрған. Алайда, тұрғын үй кезегінен шығарылған. Сол себепті көпбалалы ана аудандық тұрғын үй-коммуналдық шаруашылық және тұрғын үй инспекциясы бөлімінің үстінен сотқа шағым түсіруге мәжбүр болды.

— Іс медиация рәсімі арқылы бейбіт жолмен шешілді. Келіссөздер барысында тараптар келісімге келді. Жауапкер 15 жұмыс күні ішінде «көпбалалы отбасы» санаты бойынша тұрғын үй алуға бұрынғы кезекке қайтаруға міндеттеме алды,— деп хабарлады Алматы облысы МАӘС баспасөз қызметі.

Еске салайық, былтыр елорданың әкімшілік соты 100 млрд теңге көлемінде инвесторлардың құқығын қорғап қалды.