Алматы облысындағы автовокзал жабылды ма — әкімдік жауап берді
АЛМАТЫ. KAZINFORM — Алматы облысының орталығы Қонаев қаласында орналасқан автовокзалға тұрғындар шағымданды. Бұл туралы бейнежазба әлеуметтік желілерде тарады.
Қонаев қаласының тұрғыны қаладағы автовокзалдың жазу алынып тасталғанына және жолаушыларға жағдай жасалмағанына шағымданды.
«Бұрынғы автовокзалдың жанында тұрмын. Қазір оның жазуын да алып тастапты. Енді Алматы облысының облыстық орталығында автовокзал да, дәретхана да жоқ. Ешқандай жағдай жасалмаған» — делінген бейнежазба.
Қонаев қаласының баспасөз қызметі ресми жауабында айтылған мекен-жай бойынша жолаушылар тасымалы жүріп тұрғанын және жолаушылардың ғимарат ішіне еркін кіріп-шыға алатындарын хабарлады.
«Бүгінгі таңда қалааралық және Қонаев қаласы бойынша қала маңындағы жолаушылар тасымалы «Қапшағай» жолаушыларға қызмет көрсету пунктінде көрсетіледі (бұрынғы автовокзал). Ғимараттың ауданы 400 м². Бұл жолаушыларға қызмет көрсету пункті жеке меншік «Жедел» ЖШС-на тиесілі. Жолаушылар ағыны аз болуына байланысты 2023 жылдың желтоқсанында автовокзал — жолаушыларға қызмет көрсету пункті ретінде қайта тіркелді. Осыған байланысты ғимарат қасбетінен жазулар алынып тасталды. Алайда, қалааралық рейстер пункт аумағында да жұмысын жалғастыра береді» — деп хабарлайды Қонаев қаласының баспасөз қызметінен.
