Алматы облысының Есік көлінде демалушылардан 2 рет заңсыз төлем алынған

  ҚОНАЕВ. KAZINFORM — Есік көліне кіреберісте азаматтардан екі рет төлем алынып келген. 

Бұл туралы әлеуметтік желіде көлге келген демалушылар шағымданды. Ондағы мәліметке сәйкес, Іле-Алатауы мемлекеттік ұлттық паркіне кіреберісте экологиялық бекеттен ресми төлем алынса, 10 шақырым өткеннен кейін жекеменшік деген желеумен тағы да ақша алынған. Атап айтқанда: адам басына 2 мың, жеңіл көліктерге 2,5 мың, мироавтобустар 5 мың, үлкен автобустар 20 мың.

Алматы облысының әкімдігі «Хабель» ЖШС-мен жасалған сенімгерлік басқару шартына сәйкес туристерден төлемақы алу қарастырылмағанын хабарлады.

— Басқарушының мұндай әрекеттері оның өкілеттігінен тыс әрі шарт талаптарын бұзады. Көліктерден алынатын төлемақы тек Іле-Алатау ұлттық паркі аумағында заңнамаға сәйкес белгіленген, — деп хабарлады әкімдіктен.

Облыс әкімдігі «Хабель» ЖШС-не заңсыз төлемақыны тоқтату және орнатылған шлагбаумдарды алып тастау туралы хабарлама жолдаған. 17 тамыздан бастап Есік көліне кіреберістегі шлагбаумдар алынды.

Еске салайық, биыл Алматы облысындағы Есік қаласының шекарасы екі есе ұлғайды.