Алматы тауларында қар жауып жатыр

АЛМАТЫ. KAZINFORM — Алматының таулы аймағында қар, ал қала аумағында нөсерлі жаңбыр жауып жатыр. 

«Шымбұлақ» тау курортының Богданович мұздығы, Бүгел және ортаңғы станциясында орнатылған камераларынан қазіргі уақытта қар жауып жатқанын көруге болады.

«Қазгидромет» мәліметіне сәйкес, Алматыда 23 қыркүйек күні таңғы сағат 5-тен басталған жауын-шашын 24 қыркүйек таңға дейін тоқтамайды. Қала бойынша коммуналдық және жедел қызметтер күшейтілген режимде жұмыс істеп жатыр. Мердігер ұйымдардың 123 арнайы техникасы, 74 мотопомпа, 20 ассенизатор көлігі, сондай-ақ 75 жедел бригада тартылды. Олардың құрамында 425 жұмысшы бар.

Бұған дейін жауын-шашын салдарынан Алматыдағы көлік кептеліс 10 балға жеткенін жазғанбыз.

Еске салайық, өткен апта Алматыда қатты жаңбыр жауып, Аманжол көшесінде жол жабыны опырылды. Нәтижесінде 13 автокөлік зақымданды.