Алматы тауларындағы 6 мореналды көл қауіпті
АЛМАТЫ. KAZINFORM – Алматы әкімі Дархан Сатыбалды, «Қазселденқорғау» мекемесі мен Төтенше жағдайлар департаменті басшылығы мегаполистің сел қауіпсіздігін бақылау және мониторинг жүргізу мақсатында мореналық көлдердің жай-күйіне аэровизуалды зерттеу жүргізді.
Тікұшақпен шолу барысында «Медеу», «Үлкен Алматы», «Қарғалы» су бөгеттері мен Ақсай, Кіші және Үлкен Алматы өзендерінің бассейндерінде орналасқан №6, 8, 9, 10 және 13-Бис мұздақ көлдері секілді негізгі селден қорғау нысандары қамтылды.
Төтенше жағдайлар департаменті, «Қазселденқорғау» және Сейсмикалық қауіпсіздік пен жұмылдыру дайындығы басқармасы басшыларымен бірлесіп, алдағы жұмыстар талқыланды.
Қала тауларында 51 моренді көл бар, оның 14-де бұзылу қаупі жоғары болса, ал 6-ы өте қауіпті. Бұл көлдер халық тығыз қоныстанған аймақтар арқылы ағатын өзендердің бастауында орналасқан.
«Қазселденқорғау» мекемесінің басшысы Самат Дәуленқановтың айтуынша, қауіпті нысандарда су деңгейін төмендету, сифон желілерін іске қосу және эвакуациялық арналарды тазалау секілді алдын алу шаралары жоспарланған.
Сондай-ақ бақылау күшейтіліп, 31 автоматты станция, 23 бақылау бекеті мен 8 маусымдық нүкте жұмыс істеп тұр. Арнайы техникамен жабдықталған жедел іс-қимыл тобы құрылып, кезекшілік ұйымдастырылған.
Тікұшақпен шолу кезінде гидротехникалық құрылыстар – бөгеттер мен селден қорғау бөгеттерінің техникалық жағдайына ерекше назар аударылды. Кейбір нысандарға жөндеу немесе қайта құру шешімін қабылдау үшін жан-жақты тексеріс қажет екені анықталды. Сондай-ақ, таулы бөлімшелерді арнайы техникамен, құрал-жабдықтармен және метеоқұралдармен қосымша жабдықтау қажеттілігі айтылды.
Маршрут Алматы тау кластерінің орталық аймағы арқылы аяқталды. «Chimbulak Development» ЖШС директоры Ринат Әбдірахманов арқан жолдар желісін кеңейту, трассалар мен инфрақұрылымды дамыту жоспарын таныстырды.
2028 жылға қарай кластерлік аймақтың өткізу қабілеті күніне 6 мыңнан 34 мың адамға дейін артпақ. Жоба жеке инвесторлар мен халықаралық серіктестердің қаржысы есебінен жүзеге асырылып жатыр.
Қала басшысы туризмді дамыту табиғи қауіп-қатерлерден алматылықтар мен қала қонақтарын қорғау шараларымен тығыз байланыста жүргізілуге тиіс екенін атап өтті.
Осыған дейін Алматының коммуналдық қызметі нөсер жаңбырға байланысты күшейтілген жұмыс режиміне көшкені туралы жазғанбыз.
