Алматы тұрғыны үшінші қабатта орналасқан пәтеріне заңсыз қосалқы құрылыс салған
АЛМАТЫ. KAZINFORM — Алматыда «Хан Тәңірі» тұрғын үй кешеніндегі қосалқы құрылыс сот шешімімен бұзылып жатыр.
Қала құрылысын бақылау басқармасы мәлім еткендей, Кенесары хан көшесі, 54/33 үй мекенжайындағы тұрғын үй кешенінің үшінші қабатындағы террасада заңсыз салынған құрылыс анықталды.
— Алматы тұрғыны ешқандай рұқсат құжаттарсыз өз пәтеріне бір қабатты қосымша құрылыс салып, тұрғын үй аумағын айтарлықтай ұлғайтқан. Пәтер иесі әкімшілік жауапкершілікке тартылып, бұзушылықтарды жою туралы нұсқама алды, — деп атап өтті басқармадан.
Алайда, нұсқама талаптары орындалған жоқ. Сол себепті сот шешімімен бұзылып жатыр.
Нысанды бөлшектеу жұмыстары Әділет департаменті сот орындаушыларының қатысуымен жүргізіліп жатыр.
Осыған дейін «Теректі» шағын ауданындағы Айналма көшесі, 183 учаскесінде заңсыз салынған тұрғын үй кешенінің бұзылып жатқаны туралы жазғанбыз.
