Алматыда 12 жасар қызды арбауына түсірмек болған ер адам ұсталды

АЛМАТЫ. KAZINFORM — Алматыда «Жаңа адамдар» жастар қозғалысы кәмелетке толмаған қызға қырындап, арам ойын жүзеге асырмақ болған күдіктіні әшкереледі.

«Жаңа адамдар» белсенділері 12 жасар қыздың атынан анкета ашып, оны танымал әлеуметтік желілердің біріне жүктеген. Көп ұзамай өзін «Әділет» деп таныстырған ер адам 12 жасар баланың парақшасына қызығушылық танытқан. Ол кішкентай қызға порнографиялық мазмұндағы суреттер мен бейнежазбаларды жіберген.

— «Әділет» ашық түрде жыныстық қатынасқа түсуді ұсынып, қыздан өзін жалаңаш түрде бейнежазбаға түсіруін сұрады. Өз дегеніне жете алмаған соң, қызды «кино көруге» шақырды. Чипсы мен кола сатып алып, ол біз көрсеткен мекенжайға — баланың үйіне келді. Кішкентай баланың орнына оны Жаңа адамдардың «124» азаматтық науқаны белсенділері қарсы алды. Өзінің ұсталғанын түсінген ер адам қашуға әрекеттенді. Алайда, пәтердің шыға берісінде оны «масқаралау дәлізі» күтіп тұрды, — деп хабарлады «Жаңа адамдар» желіде.

Белсенділер түсірген барлық материалдар мен хабарламалар құқық қорғау органдарына берілген және полиция қызметкерлеріне бұл эксперименттің өткізілуі туралы алдын ала ескертілген.

Алматы қаласының полиция департаменті бұл дерек бойынша тексеру жұмыстары жүріп жатқанын хабарлады.

— Объективті мән-жайлары анықталып жатыр, — деп хабарлады департаменттен.

Еске салайық, бұған дейін «Жаңа адамдар» Алматы дүкендеріндегі жарамсыз өніммен күрескенін жазғанбыз.