Алматыда 40 қабатты кешеннің құрылысы тоқтатылды

АЛМАТЫ. KAZINFORM – Алматыда RAMS Beyond 40 қабатты кешенінің құрылысы уақытша тоқтатылды. Нысанға қатысты қоғамда дау туды.

Бұл туралы Мәжіліс депутаты Бақытжан Базарбек Facebook-тегі парақшасында хабарлады.

– Бүгін біз Алматыдағы RAMS 40 қабатты ғимаратының құрылыс-монтаждау жұмыстарын тоқтаттық! Менің рейдім барысында Қала құрылысын бақылау басқармасы нысанға ресми нұсқама берді, - деп жазды депутат әлеуметтік желіде.

Қала әкімдігі бұл ақпаратқа қатысты әзірше ресми түсінік берген жоқ.

Еске салайық, мамыр айының басында құрылыс компаниясы RAMS Beyond мегажобасын таныстырған еді. 40 қабатты премиум көпфункционалды кешенге люкс резиденциялар, қонақүй, бизнес-кеңістіктер және әлеуметтік аймақтар кіруге тиіс болатын. Құрылысы Тимирязев көшесі мен Сейфуллин даңғылының қиылысында басталған.

Алайда жоба қала тұрғындарын алаңдатып қойды, себебі Алматының бұл бөлігінде биіктікке қатысты шектеулер бар.

Бұған дейін Мәжіліс депутаты Сергей Пономарев та зәулім ғимараттың салынуына қарсы шыққан еді.

Жазда қала әкімдігі 40 қабатты ғимараттың құрылысына қатысты түсінік берді.