Алматыда 500-ден астам дрон шоу ұйымдастырды
АЛМАТЫ. KAZINFORM — Алматыда Республика күнін мерекелеу аясында Абай алаңында дрондар шоуы өтті.
Республика күніне арналған мерекелік іс-шара қала тұрғындары мен қонақтары үшін таңғажайып көрініс ұсынды. Шоу шамамен 20 минутқа созылды, оны 15 мыңға жуық алматылық тамашалады.
Аспанға бір мезетте 500-ден астам дрон ұшып, ұлттық мәдениет элементтері мен ел тарихындағы маңызды сәттерді бейнелейтін ерекше бағдарламаны ұсынды. Атап айтқанда, Қазақстанның географиялық картасынан бастап, Мемлекеттік ту, киіз үй, Алтын адам, алма, қызғалдақ және өзге де бейнелер көрсетілді.
Еске салайық, бұған дейін Алматыда Республика күніне орай Мемлекеттік ту көтерілгенін жазғанбыз. Мемлекеттік тудың көлемі 98 шаршы метр, биіктігі 40 метр болды.
Сондай-ақ Республика күніне орай «Көктөбе» телемұнарасында мерекелік сәулеттік жарықтандыру қосылды.
