Алматыда 500-ден астам заңсыз сауда орындары мен ойын-сауық аппараты бұзылды

АЛМАТЫ. KAZINFORM — Алматыда заңсыз дүңгіршіктерді бұзу жұмыстары жүріп жатыр. 

Қала әкімдігінің мәліметінше, Алматыда көшедегі заңсыз сауданы жою мақсатында 306 заңсыз орнатылған стационарлық емес сауда нысаны мен 222 ойын-сауық аппараты (күш өлшеуіш) бұзылды. Сонымен қатар мемлекеттік жер қорында заңсыз тұрғызылған 32 күрделі құрылымды мәжбүрлеп бұзу үшін сотқа талап-арыз жіберілді.

— Қалған 139 сауда орындарын бұзу жұмыстары биыл 31 наурызға дейін аяқталады. Қазіргі уақытта коммуналдық қызмет бұл нысандардың заңсыз қосылған инженерлік желілерін өшіру жұмыстарын жалғастырып жатыр, — деп хабарлады әкімдіктен.

Алматыда 2025 жылдың 4 ақпанынан бастап заңсыз сауда орындарын жою жұмыстары басталған болатын.

Еске салайық, бұған дейін Алматы облысында 215 заңсыз қоқыс үйіндісі анықталғанын жазғанбыз.