Алматыда 6 шақырымға жуық жылу желісі жаңартылды
АЛМАТЫ.KAZINFORM – Алматыда екі жыл бұрын қолға алынған жылу желілерін жаңарту жұмысы аяқталды.
Алматы әкімдігінің мәліметінше, Жетісу ауданының Айнабұлақ шағын ауданында «Алматы жылу желілері» ЖШС тапсырысы бойынша екі жыл бұрын басталған жылу желілерін жаңғырту жұмыстары толық бітті.
Жалпы ұзындығы 5 865 метр болатын жылу желілері жаңартылды.
Атап айтар болсақ, 2022 жылы – 1 730 метр, 2023 жылы – 2 000 метр, ал 2024 жылы – 2 135 метр желі қайта құрылды.
«Биыл «Айнабұлақ» ТМ-18 жылу магистралі бойынша Мақатаев көшесінде (Жұмабаев көшесінен Павлодарская көшесіне дейінгі аралық) жаңғырту жұмыстары аяқталды. Негізгі құрылыс-монтаж жұмыстары 2024-2025 жылдардың күзгі-қысқы кезеңі басталғанға дейін аяқталды. Қазір аталған учаскені көріктендіру – жол төсемін ұсақ түйіршікті асфальтпен төсеу жұмыстары жүргізіліп жатыр, кейін жол таңбалары сызылады», - деп атап өтті әкімдіктен.
Жылу магистралі 1981 жылы қолданысқа берілген, оның пайдалану мерзімі – 43 жыл, ал нормативтік пайдалану уақыты – 25 жыл.
Жоба 344 көпқабатты үйдің, 11 мектептің, 3 денсаулық сақтау және 483 басқа да нысанның тұрғындарын сапалы жылумен қамтамасыз етеді.
Биыл мегаполисте 20 шақырым жылу желісі қайта жаңғыртылып, қаланың 6 ауданында жылуаралық кезеңде жұмыстар жүргізілді.
Бұған дейін Алматыда 219 км жаңа сумен жабдықтау желісі салынғаны туралы жазған едік.
