Алматыда алимент берешегі 1,5 млрд теңгеден асты

АСТАНА. KAZINFORM – Алматы қаласының Алмалы ауданында ЖСО-ның орындауындағы атқарушылық іс жүргізудегі алимент бойынша берешек сомасы 1,5 млрд теңгеден асты.

Тексеру нәтижесінде көптеген борышкер автокөліктері мен жылжымайтын мүліктерінің болуына қарамастан, сот шешімдерін орындаудан саналы түрде жалтаратыны анықталды.

Осыған байланысты прокуратураның бастамасымен қаланың полиция департаментімен бірлескен жұмыс ұйымдастырылды.

— Қабылданған шаралардың нәтижесінде борышкерлердің 22 автокөлігі ұсталып, айыппұл тұрағына қойылды. Бес іс бойынша мүлік алынғаннан кейін 7 миллион теңгеден астам қарыз толығымен өтелді. Өндірілген қаржының жалпы сомасы 74 млн теңгеден асты. Жасалған заңбұзушылықтар үшін ең қасақана жалтарғандар жауапқа тартылды, соның ішінде қылмыстық жауапкершілікке де. Олардың біреуі Қылмыстық кодекстің 139-бабына сәйкес кінәлі деп танылған: ол сот шешімін қасақана орындамаған және кірісін жасырған, нәтижесінде 11 миллион теңгеден астам қарыз болып шықты, — делінген Алматы қаласының прокуратурасы таратқан хабарламада.

Оған пробациялық бақылаумен бас бостандығын шектеуге бір жыл жаза берілді. 

Айта кетелік сот орындаушылар жарты жылда 18 млрд теңгеден астам алимент өндірді.