«Алматы арена» жанындағы көше жабылып, уақытша автотұрақ орындары ашылады
АЛМАТЫ. KAZINFORM — Алатау ауданында Наурыз мерекесінің тойлануына орай көлік қозғалысы уақытша шектеледі.
19 наурызда сағат 00:00–ден 24 наурыз күні 00:00–ге дейін Момышұлы көшесінен Доспанова көшесіне дейінгі учаскедегі Универсиадная көшесі бойынша қозғалыс уақытша шектеледі. Бұл шешім іс-шараларға қатысушылардың қауіпсіздігін қамтамасыз етуге, сондай-ақ қала тұрғындары мен қонақтары үшін қолайлы жағдай жасауға бағытталған.
22 наурыз күні сағат 19:00–де «Алматы Аренада» өтетін «Tynda Music» концертіне қатысушыларға ыңғайлы болу үшін қосымша тұрақ аймақтары ұйымдастырылады:
* Момышұлы көшесіндегі жаңа мешіт аумағында;
* «Алматы Арена» спорт кешенінің аумағында;
* «Алатау» дәстүрлі өнер театрының аумағында.
— Қала әкімшілігі Алматы тұрғындары мен қонақтарын маршруттарды алдын ала жоспарлауға, жол қозғалысындағы уақытша өзгерістерді ескеруге және ұсынылған тұрақ аймақтарын пайдалануға шақырады, — деп хабарлады әкімдіктен.
Еске салайық, бұған дейін Алматыда Наурыз қалай тойланатынын жазғанбыз.
Сондай-ақ бірнеше күнге Төле би даңғылының бір бөлігі жабылатынын жазған едік.
