Алматыда биыл электр желілерінің тозуы 63 пайызға дейін төмендейді
АЛМАТЫ. KAZINFORM — Алматыда электр, сумен қамтамасыз ету және кәріз желілерін реконструкциялау жұмыстары жалғасады.
Алматы қаласы Энергетика және сумен жабдықтау басқармасының мәліметінше, мегаполистің электр желілерін 2030 жылға дейін және 2040 жылға дейінгі перспективамен дамыту схемасы әзірленген. Жоба аясында биыл 123 км электрмен жабдықтау желілері реконструкциядан өтеді. Бұл жұмыстар электрмен жабдықтау желілерінің тозуын 63,3%-ға дейін төмендетпек.
Одан бөлек осы жылы 260 км жаңа сумен қамту және су бұру желілері салынып, 87 км желі жаңғырту жоспарланған. Өткен жылдың 9 айында 219 км жаңа желі салынса, 30 шақырымдай қолданыстағы желілер жаңғыртылған.
— Осы шаралардың нәтижесінде 2025 жылы су құбырлары желілерінің тозу деңгейі 52,9%-ға, кәріз желілерінің тозуы 53,8%-ға дейін төмендейді, — деп хабарлады Энергетика және сумен жабдықтау басқармасынан.
Еске салайық, бұған дейін Абай, Төле би, Жұбанов көшелерін ұзарту жұмыстары қашан аяқталатынын жазғанбыз.
