Алматыда халықаралық Digital форумы басталды
АЛМАТЫ. KAZINFORM – Алматыда «Digital Almaty: Х индустриясы – болашақтың цифрлық эволюциясы» атты цифрлық форумы өз жұмысын бастады.
Цифрлық даму, инновациялар және аэроғарыш өнеркәсібі министрі Бағдат Мусиннің, айтуынша,өнеркәсіпті цифрландыру – бүгінгі күннің жаңа талабы және экономиканың әртүрлі салаларында, соның ішінде машина жасау, тұрмыстық техника және тау-кен өнеркәсібінде қолданылады.
«Мемлекет басшысы алдымызға 2026 жылға қарай ІТ-экспорт көлемін 1 млрд долларға дейін ұлғайтуды және Қазақстанды өңірдегі жетекші цифрлық орталықтардың біріне айналдыру міндетін қойды. Біздің барлық бастамаларымыз, соның ішінде Google for Startups және Draper University-мен бірлескен бағдарламалар, Silkroad Innovation хабын іске қосуға қолдау көрсету, Digital Bridge және Digital Almaty IT форумдарын өткізу – осы мақсатқа жету құралдары», - деді министр.
Сонымен қатар, ол форумда ұсынылған идеялар нақты шешімін табатынын жеткізді.
«Digital Almaty» – бизнес өкілдері, халықаралық сарапшылар және IT-қоғамдастық кездесетін бірегей алаң. Форумда ұсынылған идеялар нақты шешімін табады. Оған жарқын мысал: 2023 жылы Кремний алқабында Silkroad Innovation Hub құрылуы. Бүгінде хаб жаңа стартап жобалардың тартылыс нүктесіне айналды әрі өңірімізде цифрлық шешімдерді қолдану аймағын кеңейтуде күш-жігерін біріктірді. Бұл жерде стартаперлер өз идеяларын көрсетуге және инвесторлар табуға мүмкіндік алады», - деді Бағдат Мусин.
Биыл «Digital Almaty» VI форумы өнеркәсіптегі цифрлық трансформация, GovTech, 4.0 индустриясы, ESG, Smart City және басқа да салалардағы инновациялық шешімдерді ұсынатын ауқымды іскерлік бағдарламаны ұсынбақ.
Панельдік пікірталастар шеңберінде халықаралық сарапшылар, сала көшбасшылары, IT және бизнес саласындағы жетекші инноваторлар қатарынан 200-ден аса спикер қатысып жатыр.
