Алматыда Қытайдың Changan, Chery, Haval маркалы автокөліктері шығарыла бастайды
Алматыда екі жаңа автозауытты іске қосу жоспарланған. Бұл туралы Алматы қаласының кәсіпкерлік және инвестициялар басқармасы мәлімдеді, деп хабарлайды Kazinform.
Ведомствоның мәліметінше, Алматыда кемінде 220 мың автоөндірісі бар автокластерді қалыптастыру шеңберінде жобалық қуаты 170 мың автомобильге дейінгі 2 жаңа автозауытты іске қосу жоспарланып отыр. Жоба аясында қытайлық Changan, Chery, Haval брендтерінің мультибрендтік зауыты жылына 90 мың авто және Orbis Manufacturing зауыты жылына 80 мың авто құрастырмақ.
Сондай-ақ Алматыда экономиканы сапалы дамыту мақсатында жыл сайын 10% деңгейдегі өсіммен инвестиция тарту жоспарланып отыр. Бұл ретте инвестиция көлемі 2024 жылы 1,8 трлн теңге, 2025 жылы 2,1 трлн теңгеге жетпек.
Сонымен қатар Алматы қаласының индустриялық аймағын 194 гектарға кеңейту 2025-2026 жылдары 230 млрд теңге сомасына қосымша 7 ірі жобаны іске асыруға мүмкіндік береді.
«Осы шаралардың арқасында қала экономикасының өсуі 2024 жылы 5,5% деңгейінде, 2025 жылы 6,5%-ға дейін өсуін жеделдете түседі деп күтіледі», - деп хабарлады қалалық кәсіпкерлік және инвестициялар басқармасында.
