Алматыда қоғамдық кеңестің бұрынғы мүшесінің ісі сотқа жолданды
АЛМАТЫ. KAZINFORM — Ер адамға алты жастағы балаға қол көтерді деп айып тағылып отыр.
Оқиға жаздың басында болған. Әлеуметтік желілерде мейрамханалардың біріндегі ойын бөлмесінде ер адамның баланы екі рет ұрған сәті түсірілген видео тарады. Бұған оның баласына балалар ойнап жүрген ойыншық шардың байқаусызда тиіп кетуі себеп болған.
Зардап шеккен баланың анасы ер адамның әрекеті ұлына ауыр соққы болып тигенін айтты.
Кейінірек күдікті Алматы қаласы қоғамдық кеңесінің мүшесі екені белгілі болды, алайда көп ұзамай өкілеттігін тоқтатты.
Полиция департаменті тергеуді Медеу аудандық полиция басқармасы жүргізгенін хабарлады.
— ҚР ҚК 109-бабының 2-бөлігінің 8-тармағы (Ұрып-соғу) бойынша бірыңғай сотқа дейінгі тергеп-тексерулер тізілімінде тіркелген қылмыстық іс 2025 жылғы 25 тамызда ҚР ҚПК 528-бабы тәртібімен сотқа жолданды. Бұл шешім үш буынды модель бойынша аудан прокуратурасымен келісілді, — делінген ведомствоның ресми жауабында.
Еске салайық, бұған дейін жаңа оқу жылынан бастап Қазақстанда алғаш рет барлық мектеп мен колледжде балалар мен жасөспірімдер арасындағы буллинг оқиғаларын азайтуға бағытталған отандық «ДосболLIKE» профилактикалық бағдарламасы енгізілетінін жазған едік.
