Алматыда құрылыс компанияларына нөсер кәріздерін салу міндеттелмек

Осы жылдың 10 қазаннан бастап Алматы әкімдігінің қалада түрлі құрылыс-жөндеу жұмыстарын жүргізу кезінде нөсер кәрізін реттеу қажеттілігі туралы қаулысы күшіне енді, деп хабарлайды Kazinform.

«Қалалық мобильділік, энергетика және сумен жабдықтау, экология және қоршаған орта, жоспарлау және урбанистика, құрылыс басқармалары мен Алматы қаласы аудандары әкімдерінің аппараттары ҚР заңнамасында белгіленген тәртіппен көше-жол желісін салу, реконструкциялау, күрделі және орташа жөндеу кезінде инженерлік коммуникацияларды салудан, реконструкциялаудан және жөндеуден кейін қалпына келтіру кезінде нөсер кәріздерін реттейді», - делінген қаулыда.

Сондай-ақ, инженерлік желілерді салу, реконструкциялау және жөндеуден кейін жолдың асфальтбетон жабынын қалпына келтіру кезінде тиісті жол таңбалау сызықтарын салуды қамтамасыз ету қажет.

Нөсер кәрізі - бұл жаңбыр мен еріген суды қала аумағынан тыс жерлерге ағызып жіберуген арналған күрделі инженерлік жүйе. Жаңбыр суына коллекторлар, жаңбыр науалары, арналар, су қоймалары кіреді.

Алматыдағы арық желісінің ұзындығы - 1525 шақырым оның 1208 шақырымы нөсер кәрізі ретінде пайдаланылады.

Алматы әкімдігінің мәліметінше, 2024 жылдың соңына дейін 376 км арық желісін салу жоспарда. Оның ішінде биыл 80,1 км салынды.