Алматыда лай көшкіні қаупі бар учаскелер нығайтылып жатыр

АЛМАТЫ. KAZINFORM — Ерболат Досаев Медеу ауданының тұрғындарымен кездесу барысында тау бөктеріндегі көшкіндердің алдын алу бойынша қабылданып жатқан шаралар туралы айтып берді.

Алматы әкімінің айтуынша, былтыр Медеу ауданында 82 учаске егжей-тегжейлі зерттелді.

— Медеу ауданының тау алаптары тұрғындарының қауіпсіздігін қамтамасыз етуге ерекше көңіл бөлінеді. Өткен жылдың қазан айында қала резервінен 1,5 млрд теңге бөлініп, 17 тұрақсыз учаскені нығайту басталды. Жұмысты биыл жазда аяқтау жоспарланып отыр, — деді Ерболат Досаев.

Бұдан бөлек, 28 жер телімінің иелеріне топырақтың шайылуын болдырмау және су бұру қажеттілігі бойынша сарапшылардың ұсынымдары берілді. Сондай-ақ 16 учаскеде топырақтың бұзылуын, рельефтің деформациясын және ықтимал көшкіндерді болдырмау үшін жұмыстар жүргізіліп жатыр.

— Олимпийская көшесінде, 2023 жылдың ақпан айында көшкін жүрген жерде 1 500 шаршы метр тау бөктері тазартылды, 900 текше метр габионды құрылым орнатылды, 770 метр нөсерлі кәріз науалары салынды, 780 шаршы метр тротуар тастары төселді, 2 700 шаршы метр аумақты қамтитын арқанды-торлы жүйе орнату жұмыстары аяқталды, — деді ол.

Еске салайық, былтыр 8 ақпан күні Медеу ауданының «Тау самалы» шағын ауданындағы Олимпиский көшесі бойында техногендік сипаттағы топырақтың лайлануы салдарынан лай көшкіні болды. 

Кейін Алматы қаласы төтенше жағдайлар департаменті мен республикалық жедел-құтқару жасағының күштері үйінді астынан төрт адамның денесін тапты. 

Осыған дейін Алматыда қай жерлерге құрылыс жүргізуге тыйым салынатыны туралы жазғанбыз.