Алматыда медициналық мекеме тіркелу тәртібі қандай
АЛМАТЫ. KAZINFORM – Алматы тұрғындары мен қалаға көшіп келген азаматтар медициналық мекемеге қалай тіркеле алады? Бұл туралы №28 қалалық емхананың пациенттерді қолдау және ішкі аудит қызметінің үйлестірушісі Ажарханум Наврузова түсіндіріп берді.
Азаматтар бір ауданнан екіншісіне көшкенде не өзге өңірден мегаполиске қоныс аударғанда құжаттарды қайта ресімдеу қажеттілігімен бетпе-бет келеді. Ажарханум Наврузованың айтуынша, мұндай жағдайдағы алғашқы медициналық-санитариялық көмек ұйымдарына тіркеу процесі ҚР заңнамасында нақты белгіленген. Басты нормативтік құжат - ҚР Денсаулық сақтау министрінің 2020 жылғы 13 қарашадағы №ҚР ДСМ-194/2020 бұйрығы. Бұл ережелер өтініш беру тәртібін анықтайды және балалар мен шетелдік азаматтарды қоса алғанда, халықтың әртүрлі санаттарына қызмет көрсету ерекшеліктерін ескереді.
Маман Қазақстанның азаматтарының көпшілігі үшін тіркеу рәсімі олардың тұрақты немесе уақытша тіркелген мекенжайына, сондай-ақ медициналық мекеменің өзі орналасқан аумаққа қолжетімділігіне тікелей байланысты екенін атап өтті. Тұрғылықты мекенжайын есепке алмай, кез келген емхананы таңдау үшін тек қазақстандық азаматтықтың болуы жеткіліксіз. Мысалы, Алматыда пәтер жалдап жүрген басқа өңірдің азаматтары ең алдымен уақытша тіркеу мәселесін шешуі қажет.
Мекемені мекенжайға байланыстыру емханаларға дәрігерлік учаскелерге түсетін жүктемені дұрыс жоспарлау, профилактикалық тексерулерді ұйымдастыру және пациенттерді бақылау үшін қажет. Бұл ретте жаңа медициналық мекемеге онлайн тіркелуге болады: өтініш мақұлданған жағдайда азамат алдыңғы емханадан автоматты түрде шығарылады.
Заңнамада халықтың кейбір санаттары үшін жеңілдіктер қарастырылған. Мәселен, кәмелетке толмаған балалар, жүкті әйелдер және босанған жас аналар ресми тіркеуі болмаса да, нақты тұрғылықты мекенжайы бойынша тіркелуге құқылы. Бұл ретте бала қабылданатын медициналық мекемеге басымдық беріледі — ата-аналар да ыңғайлы болу үшін осы емхана мен учаскеге тіркеле алады.
Мүгедектігі бар адамдар үшін ерекше тәртіп қарастырылған: II және III топтағы азаматтар eGov порталы арқылы қашықтан өтініш жібере алады, ал I топ үшін жеке өтініш беру құқығы сақталады. Жоғары оқу орындары мен колледждердің студенттері оқу немесе жатақхана орнын ескере отырып, емхана таңдай алады.
Шетелдік азаматтарға медициналық көмек көрсету шарттары олардың мәртебесіне тікелей байланысты. Қазақстанда тұруға ықтиярхаты бар шетелдіктер жалпы негізде тіркеледі. Елде уақытша болатын шетелдік азаматтарға медицина үшін ықтиярхат алудың қажеті жоқ, бірақ оларға міндетті түрде ерікті медициналық сақтандырудың қолданыстағы шарты қажет болады.
Кейде eGov порталындағы электрондық өтініштер қабылданбай қалады. Маман оған өтінішті толтыру кезіндегі қателіктер, көрсетілген мәліметтердің сәйкес келмеуі немесе аумақтық қолжетімділік шарттарының бұзылуы себеп болуы мүмкін екенін айтты. Мұндай жағдайда алдымен, жеке кабинетте өтініштен бас тартудың нақты себебін анықтау қажет.
- Сондай-ақ жоспарлы амбулаториялық қызмет көрсету мен шұғыл көмекті ажырата білу маңызды. Нақты емханаға тіркелудің болмауы адамды кенеттен пайда болған қауіпті жағдайларда шұғыл медициналық көмек алу құқығынан айырмайды. Ең бастысы — өз құқықтарыңызды білу, тіркеу тәртібін түсіну және ұйымдастырушылық мәселелерді уақтылы шешу. Егер қиындықтар туындаса, асығыс қорытынды жасаудың қажеті жоқ: алдымен себебін анықтап, түсініктеме алу керек, - деді Ажарханум Наврузова.
Еске салайық, бұған дейін Алматыда МӘМС қаражатынан 130 млрд теңге қайда жұмсалатынын жазғанбыз.
