Алматыда меншік иелерінің бірлестігі мен жай серіктестік саны қанша

АЛМАТЫ. KAZINFORM - Алматы қаласында 9 367 көппәтерлі тұрғын үйге қызмет көрсететін 900-ге жуық басқару органдары бар. 

2020 жылы 7 қаңтарда «Қазақстан Республикасының кейбір заңнамалық актілеріне тұрғын үй-коммуналдық шаруашылық мәселелері бойынша өзгерістер мен толықтырулар енгізу туралы» заң күшіне енді. Заң «бір үй — бір бірлестік — бір есепшот» қағидаты бойынша «мүлік иелерінің бірлестігі» коммерциялық емес ұйымын құру арқылы басқару органдарының қызметін реттеуге бағытталды.

Kazinform агенттігі Алматы қаласы Коммуналдық инфрақұрылымды дамыту басқармасына сауал жолдап, бүгінгі күні мегаполисте негізгі басқару органдары қандай екенін сұрады.

Басқарма жауабына сәйкес, тұрғын үй-коммуналдық шаруашылық реформасы басталғаннен бері шамамен 8 000 көппәтерлі тұрғын үйді қамтитын 5 000 жиналыс өткен. Нәтижесінде 6 686 көппәтерлі тұрғын үйді қамти отырып, басқарудың 6 199 жаңа нысаны тіркелді. Оның ішінде 1 527 меншік иелерінің бірлестігі (МИБ) және 4 672 жай серіктестік (ЖС). Қалада қанша пәтер иелерінің кооперативі (ПИК) жұмыс істеп тұрғаны туралы ақпарат берілмеді.

Сондай-ақ Коммуналдық инфрақұрылымды дамыту басқармасы тұрғын үйді басқару органдары өз міндетін дұрыс атқармаған жағдайда қайда жүгінуге болатынын түсіндірді.

— Егер басқару органы (МИБ, ПИК және т. б.) өз міндеттерін тиісті түрде орындамаған жағдайда тұрғындар басқару органына қатысты шаралар қабылдау және тексеру жүргізу үшін, сондай-ақ тексеру парағының 13 тармағы бойынша бұзушылықтар болған жағдайда Достық даңғылы, 85 мекенжайы бойынша 5-қабат 504 кабинетке жүгіне алады, - делінген басқарма жауабында. 

Бұған дейін Мемлекет басшысы Қасым-Жомарт Тоқаев тұрғын үй-коммуналдық шаруашылық реформасын сынға алған еді.

— Мүлік иелері бірлестігі институтын енгізуге бағытталған реформа соңына дейін жеткізілген жоқ. Бұған қоса, мүлік иелері бірлестіктерімен қатар пәтер иелері копперативтерді де әлі жұмыс істеп тұр. Біз осы Мүлік иелері бірлестігі реформасында қатты қателікке ұрынған сияқтымыз. Қазір Үкімет әкімдермен бірге осы жағдайдан шығу жолын табуы тиіс, - деді Президент.

Еске салайық, Алматыда дизайн-код қабылданған 1 жыл ішінде не өзгергенін жазғанбыз.