Алматыда Олимпиада чемпионы Анатолий Храпатый атындағы зал ашылды
АСТАНА. KAZINFORM — Армия орталық спорт клубының Алматы филиалында Қорғаныс министрі генерал-полковник Руслан Жақсылықов жаңа ауыр атлетика залын ашты, деп хабарлайды Қорғаныс министрлігінің баспасөз қызметі.
Қорғаныс ведомствосы басшысының Алматы қаласына жұмыс сапары аясында Армия орталық спорт клубында ауыр атлетика федерациясының қолдауымен құрылған жаңа залдың салтанатты ашылуы өтті.
Спорт нысанына Олимпиада чемпионы Анатолий Храпатыйдың есімі берілді. Іс-шараға ҚР Парламенті Мәжілісінің депутаттары, спорт қоғамдастығы және АОСК-ның атақты спортшылары қатысты.
Анатолий Храпатый — ауыр атлет, бес дүркін әлем чемпионы (1985-1987, 1989-1990), 1988 жылғы Олимпиада чемпионы, 1996 жылғы Олимпиада ойындарының күміс жүлдегері.
Өмірінің соңғы жылдарында ҚР Қорғаныс министрлігі АОСК спорт бөлімінің аға офицері болып жұмыс істеді. Спортшы 2008 жылдың тамызында қайғылы жағдайда қаза тапты.
Сапар барысында министр күрделі жөндеуден өткен Жақсылық Үшкемпіров атындағы күрес залын, спортшылардың даңқ мұражайын, футбол алаңын, асхананы және басқа да инфрақұрылым нысандарын аралады.
Қорғаныс министрі басшылыққа Қарулы күштерде дене шынықтыру мен спортты дамытуға бағытталған бірқатар тапсырма жүктеді.
Бұған дейін хабарланғандай, Қорғаныс министрлігі Жеңістің 80 жылдығына арналған әскери шеруге қатысты мәлімдеме жасады.
