Алматыда онкологиялық ауруға шалдыққан науқастар саны артты

АЛМАТЫ. KAZINFORM- Алматы онкологиялық орталығында емделушілер саны жыл сайын артып келеді. Бұл туралы өңірлік коммуникациялар қызметінде өткен баспасөз мәслихатында Алматы онкология орталығының директоры Нұрсұлтан Ізмағамбетов айтты.

Спикердің сөзінше, былтыр Алматы 5491 адамнан қатерлі ісік анықталып, есепке қойылды.

«Алматы онкология орталығының есебінде 31 866 пациент бар. 2023 жылдың қорытындысы бойынша есепке алынған 5 491 пациенттің 16,2 пайызы Алматы қаласына басқа өңірлерден келіп тіркелді. Сол 890 науқастың 125-де ауру асқынған кезеңде анықталып отыр. 2022 жылмен салыстырғанда қатерлі ісікке шалдыққандар саны 8,2 пайызға көбейді»,-дейді Нұрсұлтан Ізбағамбетов.

Орталық директорының айтуынша, қатерлі ісіктен болатын өлім-жітім үш жылда 12,4%  төмендеген.

«Өткен жылы Алматының онкологиялық орталығында 22576 науқас емделді. Хирургиялық бөлімшелерде 2681 ота жасалды. Бұл ретте операцияның 55% аз инвазивті әдіспен жүргізіледі. Бүгінгі таңда химиотерапияның 50-ге жуық түрі, 40-тан астам мақсатты және гормоналды препарат қолданылады, соның арқасында 18 790 пациент химиотерапиялық ем алды»,-дейді онколог.