Алматыда ірі құрылыс нысаны бұзылып жатыр
АЛМАТЫ. KAZINFORM — Алматыда 1350 шаршы метрден астам салынып жатқан ғимарат бұзылып жатыр.
Қала құрылысын бақылау басқармасының мәліметінше, Шұғыла ықшамауданы, «Бау-бақша серіктестігі» тұтыну кооперативі, 110-учаскеде құрылысы жүріп жатқан нысанды сот заңсыз деп таныды.
Жоспардан тыс тексеріс нәтижесінде меншік иесі нысанды рұқсат құжатынсыз шаруашылық тәсілмен тұрғызғаны анықталған.
Басқарма меншік иесіне қатысты ӘҚБтК 316-бабы 1, 321-бөлігі бойынша шаралар қабылдады және жол берілген бұзушылықтарды жоюға ұйғарым берген, меншік иесі оны өз кезегінде орындамады.
«2023 жылы 20 маусымда басқарма Наурызбай аудандық сотына бұзу туралы талап арыз берді. Қазан айында сот талқылауларының нәтижесі бойынша басқарманың талап-арыздары қанағаттандырылды», -деп атап өтті басқармадан.
Бүгін әділет департаменті сот орындаушыларының қатысуымен меншік иесі нысанды бұзуды бастады.
Естеріңізге сала кетейік, бұған дейін Алматы әкімі Ерболат Досаев заңсыз құрылысқа бақылауды күшейтуді тапсырған болатын.
Жалпы, қалады былтырдан бері 33 заңсыз нысан толығымен және жартылай бұзылды, оның ішінде бизнес орталық, мейрамхана, қосалқы құрылыс пен автосервис, сондай-ақ Мечта және KHAN сияқты ірі тұрғын үй кешендері бар.
