Алматыда сараптамадан өтпеген жол жобасына 202 млн теңге жұмсалған
АСТАНА. KAZINFORM — Алматыда сапасыз автожол жобасын жасағаны үшін сотқа дейінгі тергеу басталды, деп хабарлайды қалалық прокуратураның баспасөз қызметі.
Алматы қаласының прокуратурасы автомобиль жолын қайта жаңарту жобасын әзірлеу кезінде бюджет қаражатын заңсыз жұмсау фактілерін анықтады.
Жергілікті Жол инфрақұрылымын дамыту басқармасы мердігерге мемлекеттік сараптамадан өтпеген және іске асырылуы мүмкін емес жобалық-сметалық құжаттама үшін 202 млн теңге төлегені анықталды.
Бұдан бөлек тапсырыс беруші 27 млн теңгеге шарттың орындалуын қамтамасыз ету үшін тұрақсыздық айыбын өндіріп алмаған.
— Лауазымдық өкілеттіктерін теріс пайдалану фактісімен прокуратура Қазақстан Республикасы Қылмыстық кодексінің 361-бабымен сотқа дейінгі тергеп-тексеруді бастады. Тергеп-тексеруді Алматы қаласы ҰҚКД-нің Сыбайлас жемқорлыққа қарсы қызметі жүргізіп жатыр. Қылмыстық-процестік кодекстің 201-бабына сәйкес өзге мәліметтер таратуға жатпайды, — делінген хабарламада.
Осыған дейін жол сапасын бағалауға Жапония технологиясы тартылуы мүмкін екенін жазғанбыз.
