Алматыда «Терренкур» саябақ аймағы қайта жаңартылады
АЛМАТЫ. KAZINFORM — Алматыда 20 жылдан астам уақыт бойы жөндеу жүргізілмеген Терренкур абаттандырылады.
«Алматыда Терренкур саябақ аймағы су айдынының айналасындағы жалпы ауданы 3,4 га учаскені реконструкциялау басталады. Бұл аймақ Тәттімбет көшесі мен Достық даңғылына жақын маңдағы шығыс бөлікте орналасқан», - деп хабарлады әкімдіктен.
Мұнда кең демалыс аймағы, тоған бойындағы серуендеу жолы және өтпелі көпір бар.
Жұмыс біткен соң мұнда тоған бойында серуендеу жолы бар кең демалыс аймағы пайда болады. Әдемі тоғанның аумағында судың жанында өнер көрсетуге арналған сахна құрылады. Оған қарама-қарсы заманауи ашық амфитеатр орналасады. Келушілердің жайлылығы үшін жаңа балалар және спорт алаңдары, орындықтар мен қоқыс жәшіктері, жарықтандыру тіректері орнатылады. Ауданы 19,6 мың шаршы метр учаскені көгалдандыру, 2,8 мың шаршы метр тротуар плиталарын төсеу және автосуару жүйесін енгізу бойынша жұмыстар жоспарланған.
«Реконструкция аясында тоғанды абаттандыру да қарастырылған, осыған байланысты қазіргі уақытта су жоқ. Жұмыс аяқталғаннан соң су беріледі. Жұмыс маусым айының басында басталып, осы жылдың соңына дейін аяқталады», - деп атап өтті әкімдіктен.
Айта кетерлігі, Терренкурдағы денсаулық соқпағы 1974 жылы салынған. Бұл аумақ жеке меншікте болды және жөндеу жұмыстары 20 жылдан астам уақыт бойы жүргізілмеген.
2023 жылы учаске коммуналдық меншікке қайтарылды, содан кейін реконструкциялау жөнінде жобалау-сметалық құжаттаманы әзірлеу жұмыстары басталды.
