Алматыда туберкулезбен ауыратындар саны 3 есе төмендеді
АЛМАТЫ. KAZINFORM — Алматыда туберкулез бойынша эпидемиологиялық жағдай тұрақты. Бұл туралы өңірлік коммуникациялар қызметінде өткен баспасөз мәслихатында қалалық «Фтизиопульмонология орталығының» мониторинг және бағалау орталығының жетекшісі Сәулеш Әуезова мәлімдеді.
Спикердің сөзінше, кейінгі 10 жылда қалада туберкулезге шалдығу көрсеткіші 60,5%-ға, ал өлім-жітім деңгейі 82,7%-ға төмендеген.
– Жыл сайын қалада 484 жаңа туберкулез жағдайы тіркеледі. Ауру жұқтырғандардың 30%-дан астамы қауіп тобындағы адамдар – қант диабеті, өкпенің созылмалы аурулары бар науқастар, ұзақ мерзімді гормоналды терапия қабылдайтындар, АИТВ жұқтырғандар, алкоголь мен есірткіге тәуелді азаматтар. Сонымен қатар науқастардың шамамен 8 пайызы белгілі бір тұрғылықты жері жоқ адамдар, - деп атап өтті Сәулеш Әуезова.
Айтуынша, қалалық зертханада туберкулезді небәрі 1,5-2 сағат ішінде анықтауға мүмкіндік беретін заманауи жабдықтар бар.
– Сондай-ақ Xpert MTB/XDR аппараттары орнатылған жоғары технологиялық зертханалар жұмыс істейді, олар туберкулезге қарсы препараттарға төзімділікті 90 минут ішінде анықтай алады. Үш қалалық емханада G-Xpert ПТР аппараттары жұмыс істейді, бұл молекулалық-генетикалық диагностикамен қамтуды 32,2%-ға арттырды, - деді ол.
Жаңа препараттарды енгізу есебінен дәріге төзімді туберкулезді емдеу ұзақтығы 18–24 айдан 6-9 айға дейін қысқарды.
– Алматыда BPaLM режимі бойынша «Претоманид» препараты қолданылатын пилоттық жоба жалғасып жатыр. Қазір 91 науқас осы бағдарлама аясында ем қабылдауда, олардың 48-і терапияны сәтті аяқтады, - деді ол .
2024 жылы амбулаториялық ем қабылдайтын 963 пациентке 197,8 млн теңге көлемінде көмек көрсетілді. Сонымен қатар пациенттердің 57%-ы дәрі-дәрмектерді қашықтан, бейнебақылау арқылы алады. Әйелдер мен балаларға, қарттар мен қозғалысы шектеулі пациенттерге арналған арнайы мобильді топтар дәрі-дәрмектерді үйлеріне жеткізеді.
Еске салайық, былтыр Алматыда балалар арасында туберкулез ауруы көбейген болатын.
