Алматыда тұрғын үйдің жерасты тұрағын заңсыз сату дерегі тексеріледі
АЛМАТЫ. KAZINFORM — Алматыда «Dragon City» тұрғын үй кешенінің тұрғындары жерасты тұрағын заңсыз қайта сату, қазандықтың жұмысы және жерасты үй-жайында трансформаторлы қосалқы станцияны орналастыру сияқты бірқатар өзекті мәселелер көтерді.
«Dragon City» тұрғын үй кешенінің тұрғындары Алматы әкімі Дархан Сатыбалдымен кездесу кезінде өз шағымдарын білдірді. Олардың айтуынша, бастапқы жоба бойынша пәтерлер паркингпен бірге сатылған. Алайда кейінірек шарттар өзгеріп, көлік орындарының құны 3-тен 10 млн теңгеге дейін өскен. Одан кейін бұл аумақ толығымен коммерцияға берілген. Тұрғындар пікірінше, бұл әу бастан жоспарланған алаяқтық әдіс.
Алматы әкімі жауапты органдарға осындай шешімдердің қалай қабылданғанын, кім рұқсат беріп, құжаттарға кім қол қойғанын анықтауды тапсырды.
— Іс-қимыл алгоритмі Экономикалық тергеу департаментімен, прокуратура, ТЖ және басқа да қызметтермен бірлесіп әзірленетін болады. Қажет болса, трансформаторлық қосалқы станцияны ауыстырамыз. Ең бастысы — кешеннің 2 жарым мыңға жуық тұрғынның қауіпсіздігі мен өміріне төнетін кез келген қатердің алдын алу, — деді әкім.
Еске салайық, бұған дейін Алматыда аудан әкімдері қатаң сөгіс алды.
