Алматыда үш күдікті әлеуметтік желі арқылы адамдарды алдап, ақша бопсалаған

АЛМАТЫ. KAZINFORM –  Алматыда әлеуметтік желі арқылы жәбірленушіні алдап, қылмыс жасаған күдіктілер ұсталды.

Алматы полиция департаменті баспасөз қызметінің хабарлауынша, бұған дейін әлеуметтік желіде қылмыскерлер өзін әйел ретінде көрсетіп, ер адамдармен танысқан бірнеше жағдай тіркелген. Хабарламалар алмасып, жәбірленушінің пәтерінде кездесу ұйымдастырғаннан кейін оның «таныстары» келіп, ағасы сияқты кейіп танытқан. Олар жыныстық сипаттағы зорлық-зомбылық туралы шағым түсіреміз деп қорқытып, ақша бопсалаған.

Жуырда осындай оқиғалардың бірі Жетісу ауданында әшкереленді. Үш күдікті: әйел адам мен оның екі сыбайласы ұсталды. Барлығы уақытша ұстау изоляторына қамалды.

Аталған дерек бойынша қылмыстық іс қозғалып, сотқа дейінгі тергеу жүргізіліп жатыр.

– Қала тұрғындарына интернет арқылы танысу әрдайым қауіп төндіруі мүмкін екенін ескертеміз. Сондықтан бейтаныс адамдарға сенбеуге, сақ болуға, егер қорқыту немесе бопсалау жағдайы болса, дереу полицияға хабарлауға шақырамыз. Әрбір осындай дерек мұқият тексеріліп, кінәлілер заңға сәйкес жауапкершілікке тартылады, - деді Жетісу аудандық полиция басқармасының бастығы Жәнібек Шынасылов.

Еске салайық, бұған дейін Павлодарда әскери қызметшіні бопсалап, ақша алып келгендер ұсталғанын хабарлағанбыз.