Алматыда үш күнде екі мыңға жуық жер дүмпуі тіркелді
АЛМАТЫ. KAZINFORM - Сейсмикалық зерттеулер ұлттық ғылыми орталығының мамандары үш күн ішінде Алматы маңында екі мыңға жуық жер дүмпуін тіркеді.
Ұлттық сейсмологиялық бақылау және зерттеулер ғылыми орталығының сейсмологиялық обсерватория басшысы Жансая Досымбекованың айтуынша, осыдан үш күн бұрын Қытай мен Қырғызстан шекарасында болған жер сілкінісінен кейін елде әлсін-әлсін жер дүмпуі әлі жалғасып жатыр.
«Қазіргі таңда 2 мыңға жуық әлсіз жер сілкіністері тіркелді. Оның 10-ын алматылықтар сезінді. Жер дүмпуі 2-3 балл деңгейінде болды. Соңғысы түнгі сағат екілер шамасында тіркелді», - дейді маман.
Спикердің сөзінше, бұл дүмпулер қауіп төндірмейді.
«Себебі мұндай жер сілкінісінен кейін әлсіз дүмпулер міндетті түрде болып тұрады. Ол жылдар бойы созылуы мүмкін. Сондықтан тұрғындарға қорқуыға негіз жоқ», - деді ол.
Еске салайық, 23 қаңтар түнде Алматыда 5 балл деңгейінде жер сілкінді. Алматылықтардың айтуынша, жерасты дүмпуі осы жолы қатты сезілді. Ұзақ уақыт бойы шайқалған. Тұрығындар үрейленіп, үйінен көшеге, далаға шықты.
