Алматыда ұсталған 6 микроқаржы ұйымынан келген шығын 30 млрд теңгені құрады

АСТАНА. KAZINFORM – Бұл туралы Қаржылық мониторинг агенттігінің баспасөз қызметі хабарлады.

Онда бұған дейін ҚМА-ның Алматы қаласында алты микроқаржы ұйымының заңсыз қызметі әшкереленгені туралы хабарланған.

Қаржы нарығын реттеу және дамыту агенттігінің шешімімен екі компания микроқаржылық қызметті жүзеге асыру лицензиясынан айырылды, сондай-ақ тағы төрт аффилирленген МҚҰ-ға қатысты тексеру жүргізіліп жатыр.

Белгілі болғандай, алты микроқаржы бір құрылым ретінде жұмыс атқарған, олар бір кеңсені пайдаланып, онда 200-ден астам қызметкер жұмыс істеген, ал олардың қызметі шетелдік азаматтардың бақылауында болған.

Сот, қарыз алушылардың 130 кепілдік шартын жарамсыз деп тану туралы талаптарын қанағаттандырды, осылайша азаматтар міндеттемелерден босатылды, ал МҚҰ алынған қаражатты қайтаруға міндеттелді.

Еске сала кетейік, олардың әрекеттерінің нәтижесінде 327 мыңнан астам адам зардап шекті, келтірілген залал 30 млрд теңгені құрайды.

- Агенттіктің бастамасымен Алматы қаласының прокуратурасы 327 мың азаматтың мүддесі үшін сотқа арыз түсірді, - делінген хабарламада.

Осыған дейін «Asar Baspana» қаржы пирамидасы 86 мыңнан астам азаматтан 12,4 млрд теңге тартқаны туралы жаздық.