Алматыда үйін жылыжайға айналдырып, қарасора өсірген күдікті ұсталды

АЛМАТЫ. KAZINFORM - Алматыда ірі есірткі зертханасы жойылды. Полиция қызметкерлері үйін жылыжайға айналдырып, қарасора өсірген күдіктіні ұстады.

Есірткі зертханасы Әуезов ауданының жеке секторында орналасқан. Криминалдық полиция және есірткі қылмысына қарсы күрес басқармасының қызметкерлері оны арнайы іс-шара барысында анықтады.

– Қылмыстық іс-әрекетті ұйымдастырған 36 жастағы ер адам ұсталды. Атап айтқанда, жылыжай қызметін атқарған үйден 270 түп қарасора, 3 бөшке иісі бар сұйықтық, 3 қап тыңайтқыш, 17 қышқыл ерітіндісі, тамақ таразысы, 23 жарықтандыру шамы және т.б. зертханалық құрал-жабдықтар табылды. “Технолог” қылмыстық әрекетін мойындады. Аталған дерек бойынша Әуезов аудандық полиция басқармасының қызметкерлері сотқа дейінгі тергеу амалдарын бастады, – деді Алматы қалалық ПД криминалдық полиция басқармасының бастығы Талант Исаев.

Сонымен қатар полиция қызметкерлері есірткіні өндіруге қатысы болуы мүмкін басқа да адамдарды, сондай-ақ оны тарату арнасын анықтау бойынша жедел іс-шаралар жүргізіп жатыр.

ҚР ҚК-нің 201-бабына сәйкес өзге ақпарат тергеу мүддесіне орай жария етілмейді.

Еске салайық, бұған дейін Екібастұзда синтетика өндіретін есірткі зертханасы жойылғанын жазғанбыз.