Алматылық жасөспірім 5,6 млрд теңге цифрлық активтерді заңсыз айналдырған

АСТАНА. KAZINFORM – Қаржылық мониторинг агенттігінің Алматы қаласы бойынша департаменті тиісті рұқсат құжаттарынсыз цифрлық активтердің заңсыз айналымына қатысты істің тергеуін аяқтады.

Агенттіктің баспасөз қызметінің хабарлауынша, 2020 жылы қыркүйекте, кәмелеттік жасқа толмаған күдікті «Telegram» мессенджері мен «OLX» платформасында айырбастау операцияларын жүргізетіні туралы хабарландырулар орналастырған.

«Binance» криптобиржаның пайдаланушылары тек ересектер бола алатындықтан, ол аккаунт жасау үшін ағасына верификациядан өтуін сұраған.

2021 жылы ол айналым сомаларын бөлшектеу және бұғаттау тәуекелін төмендету үшін өзінің туыстарының атына қосымша тағы үш аккаунт тіркеген.

Сөйтіп 2021-2024 жылдар аралығында жалпы сомасы 5,6 миллиард теңге цифрлық активтердің заңсыз айналымын ұйымдастырған.

Көрсеткен қызметі үшін алынған сыйақы мөлшері - 0,5%-дан 2,5%-ға дейін.

Күдікті өзінің заңсыз табысына Mitsubishi автокөлігін сатып алған.

Сот үкімімен ол ҚР ҚК 214-бабының 2-бөлігі 2-тармағы бойынша (заңсыз кәсіпкерлік, аса ірі мөлшерде табыс алумен ұштасқан) кінәлі деп танылып, 2,5 жылға еркіндігін шектеу жазасына кесілген.

Сондай-ақ, мемлекет кірісіне 5 172 USDТ цифрлық активтері мен Mitsubishi автокөлігі тәркіленді.

Атап өту керек, заңсыз крипто айырбастау орындары өз клиенттерін сәйкестендірмейді және күдікті операцияларды анықтамайды. Сондықтан, олардың қызметтерін көбіне кибералаяқтар мен есірткі заттарын өткізушілер пайдаланады.

- Еске салайық, 2024 жылы жалпы айналымы 60 млрд теңге болатын 36 заңсыз крипто айырбастау пункті жойылды. 4,8 млн USDT (шамамен 2,5 млрд теңге) сомасына активтер бұғатталып, тәркіленген. Қазақстан Республикасының «Цифрлық активтер туралы» Заңына сәйкес елдегі цифрлық активтердің айналымына қатысты кез келген қызмет лицензияны қажет етеді, - делінген хабарламада.

Осыған дейін «Asar Baspana» қаржы пирамидасының 86 мыңнан астам азаматтан 12,4 млрд теңге тартқаны туралы жаздық.