Алматыда жастарға арналған жасанды интеллект мектебі ашылды

АЛМАТЫ. KAZINFORM — Алмалы ауданындағы комьюнити орталықта жастарға арналған жасанды интеллект мектебі жұмысын бастады. 

Алматы қаласы Жастар саясаты басқармасының қолдауымен IT Qazaq Community серіктестігі жүзеге асырған жоба жастардың цифрлық дағдыларын дамытуға бағытталған. 

Жастар саясаты басқарма басшысы Азиз Қажданбектің айтуынша, бір орталықта басталған жоба сәтті болса, мұндай курстар барлық комьюнити орталықта іске қосылады. 

— Жасанды интеллект — болашақтың технологиясы. Оны жоққа шығаруға болмайды. Өйткені ЖИ кәсіпте де, IT саласында да, оқу-білім процессінде де қолданысқа енді. 2025 жылдың басында өзімізге жастарды осы бағытта оқытсақ деген мақсат қойып, бүгін оны орындау үшін Qazaq Community қауымдастығымен меморандумға қол қойдық, - деді ол. 

Жоба аясында Алматы жастары жасанды интеллект технологияларын тегін үйреніп, заманауи AI-құралдарын меңгеріп, оларды оқу, зерттеу және болашақ кәсіби қызметінде қолдана алады. Бағдарлама бойынша жасанды интеллект құралдары тәжірибе жүзінді оқытылып, оларды нақты қолдану тәсілдерін үйретіледі.

Жасанды интеллект курстарына ниет білдірген жастар Алмалы ауданындағы комьюнити орталыққа барып қатыса алады.

Еске салайық, бұған дейін Парламент Мәжілісінде «Жасанды интеллект туралы» заң жобасы мен ілеспе құжат таныстырылғанын жазғанбыз. Ол бойынша адам мінез-құлқын манипуляциялай алатын ЖИ құруға тыйым салынбақ.