Алматыда зорлау дерегі бойынша 29 жастағы күдікті ұсталды
АЛМАТЫ. KAZINFORM – Алматыда түнгі мекеме қызметкерін зорлады деген күдікпен ер адам ұсталды.
Алматы қаласының полиция департаменті әлеуметтік желілерге мониторинг жүргізіп, өзін Елисей деп таныстырған тұлғаның бейнежазбасына мән берген. Ол бейнероликте қаладағы түнгі мекемелердің бірінде зорлау дерегі болғандығы туралы хабарлаған.
- Аталған дерек бойынша Медеу аудандық полиция басқармасы қылмыстық іс қозғады.
Жедел-іздестіру іс-шаралары барысында жәбірленушінің жеке басы анықталып, ол полицияға ресми түрде арызданды.Күдікті ретінде 29 жастағы азамат – аталған мекеменің басшысы ұсталып, уақытша ұстау изоляторына қамалды. Қазіргі уақытта қажетті тергеу амалдары жүргізіліп жатыр.
Тергеу барысында күдіктінің әрекетіне құқықтық баға беріледі, оның ішінде мәлімделген жағдайлар ескерілетін болады, - деп хабарлады полициядан.
Тергеу барысы Алматы қаласы полиция департаменті басшылығының бақылауында.
Еске салайық, бұған дейін Ақнәр Гүлстан өліміне қатысты тергеу барысы департамент басшылығының ерекше бақылауында екені хабарланды.
