Алматыдағы Қарғалы өзенінің аты өзгере ме – әкім жауап берді

АЛМАТЫ. KAZINFORM – Алматы қаласының әкімі Ерболат Досаев Наурызбай ауданының тұрғындарымен кездесті. Сұрақ-жауап сессия кезінде аудан тұрғыны Қарғалы өзенінің атын өзгертуді ұсынды.

- Бұл Қарағайлы ауылы (ықшам аудан) және қасында ағып жатқан өзен – Қарағайлы өзені. Сіз мұны ауыстырам деп айтқансыз. Бүгінге дейін ауысқан жоқ. Қарғалы өзені Қарғалы ауылында ағып жатыр. Ал біздікі – Қарағайлы, – деді тұрғын.

Айтылған сұраққа жауап берген Ерболат Досаев өзен атауын өзгерту мәселесі Республикалық ономастика комиссиясының қарауында екенін атап өтті.

- Мен бұл сұрақты қалалық ономастика комиссиясынан өткіздім. Енді Республика бойынша комиссиямыз бар, олар қолдағаннан кейін өзгерістер болады. Жалғыз Қарағайлы емес, қалада жаңадан қосылған атаулары бірдей көшелердің аттарын өзгерту жұмыстарын жүргіземіз. Комиссия жұмысын бітіргеннен кейін осы күзде өзгерістер болады деп сенемін, – деді Алматы әкімі.

Еске салайық, бұған дейін Алматы әкімі Төле би көшесін ұзарту жұмыстары неге тоқтап тұрғанын түсіндірген болатын.

Сондай-ақ, Ерболат Досаев Алматыда 1-сыныпқа баратын балалардың 90%-ы қазақ тілін таңдайтынын айтқан еді.